XEIRA, VENRES, 17 DE MAIO 2013

dia das Letras Galegas

A CIDADE DE OURENSE: ORIXES CASTREXAS E ROMANAS,

E CONTORNA ROMANICA

Guiada por Pancho Gallego

Saída ás 8,00 h dende as paradas habituais

Teremos varias pequenas andainas de pouco máis de 1 qm cada unha; unha dentro da cidade de Ourense, e as outras por aldeas de Barbadás para achegarnos ós nosos obxectivos onde non chega o bus. E o Castro de San Tomé, claro, non está asfaltado, polo que será mellor usar calzado axeitado.

ITINERARIO

• Sairemos das paradas habituais para irmos directos cara Ourense onde antes de subir ó Castro de Santomé faremos unha parada técnica para tomar un café.

• De camiño ó castro, pararemos un momento para ver e cruzar a ponte medieval do río Loña, restaurada a finais dos anos 80.

• Inda que hai un fermoso camiño para facer a pé, subiremos en bus deica Santomé, onde nos esperará Martiño, arqueólogo de “Xeitura-Xestión Integral do Patrimonio Cultural” e vencellado á Facultade de Historia de Ourense, que nos fará de guía ata a hora do xantar. Visitaremos este enclave castrexo, con anexo romano, e vistas ben bonitas, que foi a orixe da cidade de Ourense.

• Baixaremos despois deica a Ponte Vella sobre o Miño, de orixe romana, refeita en moitas ocasións.

• Dende alí iremos camiñando polas ribeiras río Barbaña deica as Burgas e as excavacións das termas romanas. Un corto paseo sen desniveis ata o corazón da cidade. Visita destas fontes termais e o novos centro de interpretación anexo.

O XANTAR FAREMOLO NUN RESTAURANTE DO CENTRO, A UNS CENTOS DE METROS DAS BURGAS

• A tarde será máis lixeira e adicarémola a visitar diversas igrexas románicas e lugares do veciño concello de Barbadás: San Martiño de Loiro, Santa María de Sobrado do Bispo, tentaremos que nos deixen ver o Pazo de Bentrances, por unha banda. E pola outra banda deste concello, coñeceremos a igrexa de San Lourenzo de Piñor, o Pazo dos Lemos, e daremos un pequeno paseo polos barrios desta parroquia: Roma, O Hospitaliño, as Quintas, a casa familiar da escritora Carmen Martín Gaite. Seguiremos ata o San Bieito da Cova do Lobo, onde falaremos da tradición desparecida do Tarangaño e se nos acompaña o tempo teremos unhas bonitas vistas da cidade. E dependendo se imos ben de temo e non estamos moi cansos, poderiamos rematar achegándonos a ver a igrexa de Mugares, pero sen acceder ó interior onde están unhas interesantes pinturas murais. Se non, faremos outra parada técnica e colleremos camiño de volta para Coruña. Hora prevista de chegada: 9,30-10 da noite.